Jurddašatgo iežat sorbmet? Dáppe oaččut veahki:

Jus dus leat akuhtta jurdagat dahje plánat sorbmet iežat:

• Riŋge 113
• Riŋge doavtterfáktii 116 117. Doavttervávttas oaččut dasttánaga dearvvašvuođaveahki birra jándora.

Doavtterfákta sáhttá maiddái viežžat psykiátara dahje psykologa jus lea dárbu. It dárbbat boahtit akto, sáhtát váldit mielde muhtuma geasa luohtát.

Dárbbašatgo muhtumiin hupmat dál?

• Váldde oktavuođa muhtumiin geasa luohtát, dego ustit, bearaš, fástadoavttir, bagadalli, ráđđeaddi dahje psykologa oahpposajis/bargosajis.
• Telefovdna mii lea rabas birra jándora: Mental Helse 116 123 dahje Kirkens SOS: 22 40 00 40. Bálvalus lea nuvttá, ja it dárbbat almmuhit nama.
• Chat: SOS-chat (dii. 18.30–22.30)

Balatgo ahte muhtun du oahppásis leat iešsorbmenjurdagat dahje -plánat?

Oallugat geat leat kriisadilis, eaige nagot ieža ohcat veahki. Dalle lea dehálaš ahte don, gii leat su lahka, loktet ášši ja humat singuin.

• Jeara njuolggut leatgo sus plánat sorbmet iežas. Jus vástida “jua”, de jeara mot áigu dahkat dan ja goas. Jus sus leat konkrehta jurdagat dahje plánat, de fertet fuolahit ahte son oažžu profeššunála veahki. Sáhtát fállat riŋget, šiehttat áiggi ja ieš vuolgit mielde.
• Akuhttadilis, riŋge 113
• Jus háliidat dearvvašvuođabargiin digaštallat dili birra, riŋge doavtterfáktii: 116 117
• Jus dárbbašit ráđiid, riŋge Mental Helse birrajándor telefovdnii: 116 123 dahje Kirkens SOS: 22 40 00 40
• Loga eambbo maid sáhtát dahkat jus muhtun rahčá iešsorbmenjurdagiiguin (NSSF)

Go buot orru vártnuheapme ja lea váttis eallit

Iešsorbmenjurdagat eai dárbbaš mearkkašit ahte duođai sorbmet iežat. Gosii buot olbmuin leat muhtomin iešsorbmen jurdagat eallimis, dávjá eallinkriisa oktavuođas. Eanas háviid dakkár jurdagat eai bistte guhká ja “girdet meattá” almmá makkárge bohtosa haga.

Vaikko dakkár jurdagat dávjjimusat nohket iešalddis, ja eallin šaddá buoret, de lea buorre beassat hupmat muhtumiin go eallin lea váttis. Sáhttá leat ustit, bargoustit, bearašlahttu dahje muhtun ráđđeaddi.

Jus dakkár jurdagat bistet guhkit áiggi, ja rievddadit konkrehta plánan, de berret ohcalit dearvvašvuođaveahki. Buorre veahkki lea oažžumis. Váldde oktavuođa fástadoaktáriin dahje iežat oahpposaji studeanttaovttastusain.